Sharm el-Sheikh është sot qendra e diplomacisë botërore, ku po zhvillohet Samiti Ndërkombëtar i Paqes për Gazën, nën drejtimin e Presidentit egjiptian Abdel Fattah el-Sisi dhe Presidentit amerikan Donald Trump. Takimi, i cili mbahet më 13 tetor 2025, synon të përcaktojë hapat konkretë për zbatimin e marrëveshjes së armëpushimit midis Izraelit dhe Hamasit, arritur më herët këtë javë në kuadër të bisedimeve të ndërmjetësuara nga Egjipti dhe Shtetet e Bashkuara.
Në këtë samit po marrin pjesë mbi 30 udhëheqës shtetesh dhe organizata ndërkombëtare, përfshirë sekretarin e përgjithshëm të OKB-së, përfaqësues të Bashkimit Europian, vendeve arabe, si edhe Turqinë, Katarin e Arabinë Saudite.
Fokusi kryesor i bisedimeve është rindërtimi i Gazës, garantimi i sigurisë dhe krijimi i një mekanizmi të qëndrueshëm për paqen rajonale.
Sipas burimeve diplomatike, diskutimet përfshijnë edhe formimin e një administrate të përkohshme në Gaza nën mbikëqyrje ndërkombëtare, si dhe vendosjen e një force paqeruajtëse shumëkombëshe që do të sigurojë zbatimin e marrëveshjes.
Ndihma humanitare dhe rindërtimi i infrastrukturës janë gjithashtu në qendër të agjendës, me pritshmëri që miliarda dollarë ndihmë të premtohen nga donatorët ndërkombëtarë.
Ky samit shihet si një moment vendimtar pas dy vitesh lufte shkatërruese, që ka lënë mijëra viktima dhe një krizë humanitare të thellë. Megjithatë, analistët paralajmërojnë se mospajtimet politike midis palëve dhe mungesa e besimit reciprok mund të ngadalësojnë procesin e paqes.
Në fund të punimeve, pritet që të publikohet një deklaratë e përbashkët, e cila do të përfshijë planin e veprimit për fazën e parë të stabilizimit të Gazës dhe krijimin e një “rruge drejt paqes së qëndrueshme”. Pregatiti /bota-islame.com
